林鄭說要聽民意，那我這幾日就在此將各階層各年齡的市民，近日就反送中示威活動的意見感受等，讀給妳聽。以下是一個60後會計師的文章，流傳在社交媒體。她說：
媽媽自小就訓示我哋共產黨好殘暴，唔好惹佢哋。當時太細個，唔知咩事。長大咗有機會睇到文革嘅書，睇咗十幾頁，連我呢個書蟲都不忍再睇落去，摺埋。過幾年就6.4，我好驚，唔係呀嘛？我哋香港真係要交返比呢個殺人政權？
當時冇能力移民，加上有鄧小平好輕鬆咁話「舞照跳、馬照跑」，咁咪繼續喺香港，打份工，飲飲食食又出糧咯。
直到689、777上場，所有「事情」就急轉直下。保皇黨有恃無恐支持政府「施政」，通過晒所有癈鐵爛橋，使咗我哋幾千億，而呢啲「利民」基建對大部份香港人係無經濟效益嘅。我成日諗：呢筆錢可以起幾多醫院、老人院、殺少幾多校，加多幾多社工等等等等。宜家仲話：要屋嗎？東大嶼人工島就啱晒啦！……
2014年雨傘運動失敗，泛民割席，三子被捕。……之後DQ泛民、青年新政等議員，唔夠票反對倒錢落海，睇到眼火爆，又可以點？香港冇得救，開始認真考慮移民，搵多幾年錢去嘆世界，好過白交稅倒落海。
好啦送中殺到埋嚟，無啦啦話咨詢咗，直上二讀，無論幾多團體，專業人士企出嚟，提出幾多憂慮同反對，相關政府官員只係交出完全冇說服力嘅解釋。要加快移民腳步。身邊多是會計從業員，典型和理非派，講錢講前途唔講政治，遊行都冇去。仲有係淺藍，深藍，深深藍，佢哋覺得我中咗毒，我覺得佢哋未瞓醒咁咯。
6.9遊行我有去，6.12罷工去野餐，6.16遊行又去，6.21又罷工野餐，7.1遊行後野餐咗一陣。呢兩個幾星期，日以繼夜，夜以繼日咁睇晒幾個網媒嘅文字及現場報導，同埋轉載文章。喊過唔知幾多晚，心力交瘁無心工作。
6.12及7.1發生嘅事，已經有好多詳細報導，唔需要重複。我只係想講：年青人嘅抗爭舉動，改變咗我嘅退休計劃。我唔走，我要留喺香港，支持佢哋。我呢個癈中做唔到前線，但凡遊行、野餐，捐錢給反送中支援，中立網媒等，都會義無反顧地支持。所以，年青人，請比個機會我呢個60後癈中，参加你哋嘅野餐活動吧！
