吳亮星等建制派議員發動對李波的抹黑行動，有泛民直言不足為奇，因為事件已經令港人甚至國際社會，皆質疑北京是否開始逐步破壞一國兩制、甚至暗地變成一國一制，所以要出手扭轉輿論導向，「將白講成黑」，而北京一向手法是將不同刑事罪名加在異見人士頭上，「喺內地已經係常態，幾多網絡名人都係被屈嫖妓、詐騙入罪」。
有泛民立法會議員分析，數日前建制派對李波事件還顧左右而言，到昨日卻「忽然勇猛」，全力抹黑李波，相信與今次事件越鬧越大，甚至變成國際事件，外媒質疑北京破壞一國兩制有關，「北京見到件事越搞越大，開始有外媒拎呢件事批評北京，所以要扭轉成件事，將白講成黑」、將原告講成被告，咁北京可以大大聲向外國講，我係拉咗個觸犯中國法律嘅人」，想借此防止本地及外媒討論升溫，「不過佢哋手法太拙劣、執行嘅人又太蠢，立法會咁多建制派，冇一個蠢到好似吳亮星咁，真係照讀晒段WhatsApp內容」。
隨時重判禁發聲
另一泛民指出，將異見人士打成嫖妓、詐騙犯人，一向是北京「慣技」，「好似最出名個微博超級大V薛蠻子咁，佢被公安話佢涉嫌嫖娼被拉，但內地網民都話佢言論出位、針對政府，所以被網絡清洗行動打壓，用嫖娼名義郁佢」，而類似例子在內地隨處可見，「北京唔想俾外國政府抽稱佢打壓言論同政治異見，所以針對異見人士同政治犯，都會用一啲刑事罪名屈人」。
該泛民更憂慮北京為求「大話唔俾人揭穿」，可能會重判相關人士，「佢哋（北京）要等人忘記呢件事先放人，隨時會重判、或者刑滿後都軟禁，唔畀佢哋講真相」。
