左丁山 - 華人中國人 (2020-02-08)
https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20200208/20858202/
新加坡市民排隊輪候搓手液
…… 現在有不少地方為咗防範武漢肺炎侵入，實施強硬入院隔離，凡係來自中國嘅旅客，不分護照國籍，一律隔離14天先至講，菲律賓仲迫香港回菲律賓放假嘅菲傭都要隔離14天，即係間接當咗香港係「疫埠」，有歧視香港之嫌。沙田陳太嘅妹妹嘅菲傭適逢夠時間放假，妹妹同佢訂好來回機票之後，菲律賓就有如此宣佈，與菲傭緊急商量後，立即取消回國假期，取消飛機票。菲傭都知道菲國之所謂隔離營，一定與香港差得遠，放假兩星期，返國自投羅網14天，唔病都變咗病，何苦！
因為武漢肺炎，CNN、紐約時報都在報導歐洲國家及加拿大開始歧視華人，甚至用到19世紀字眼 Yellow Peril（黃禍）呢種絕對種族歧視嘅字眼，著名大學柏克萊在社交網站居然聲稱校內學生因新型冠狀病毒而滋生 Xenophobia（外國人恐懼感）係正常反應，柏克萊有好多亞裔學生，自然反感，群起要求大學道歉，大學即時認錯。藍絲朋友又廣推新加坡李顯龍之普通話演講，上半部力稱武漢肺炎不應被視為中國問題，而係世界公共衞生問題，中國非常有效率來發動抗疫舉措。
公共衞生問題，各國都有，非獨中國有，唔應該因此而歧視 Chinese（意指華人），佢透露一團新加坡遊客最近去到澳洲，欲上山觀光，竟被當地旅遊站負責人拒絕，聲言不接納 You Chinese，其實遊客係華裔新加坡公民，但澳洲人點識分呀，見到黃面孔就會指住 You Chinese，然後閂門；一個英國人（華裔）記者搭公車，側邊白色英國人立即離座走遠啲呀！李顯龍講得好似有道理，但口風一轉，就宣佈新加坡禁止中國旅客進入新加坡，成為東盟首例，新加坡政府一向講求實際實利，批評完歐美歧視 Chinese（華人），自己就同時拒絕Chinese（中國人）入境，我哋依家最怕林鄭政府處理疫情不善，香港不幸變成真正疫埠，香港人被禁止入境美加歐亞，咁就好大件事了。
