機：港人負傷抗疫
「我真係覺得我哋今次係帶住傷去抗疫。你（政府）講同心抗疫，同舟共濟，6個月前有機會講嘅時候冇講到，咁你打完（市民）咁耐先講萬眾一心，甚至講放低歧見，市民會話，你又冇放低歧見唔去起訴人？」退休前任職醫管局質素及安全總監的區結成，任內經歷中東呼吸綜合症（MERS），沙士時在九龍醫院統籌抗疫，對於這次武漢肺炎，他由政府決策錯判時機，缺乏風險溝通，談到市民搶廁紙和撲口罩，「當政府冇一個game
plan（作戰方案），市民冇可以相信嘅大訊息，惟有喺細位自保，係好正常。」
1月初，新型冠狀病毒在武漢爆發，區結成留意到，政府沒有向大眾作出警告，「袁國勇教授喺內地都係專家顧問，佢同政府冇理由冇（疫情）訊息，從而評估對香港影響。頭一浸訊息，唔一定係要安頓人心，可以係alert（警告）。」可惜教授苦口婆心進諫，一眾「官」狀病毒卻「慢三拍」。
1月21日，袁國勇指擔心武漢肺炎會出現03年沙士的情況；1月23日，曾指高鐵旅客不用填健康申報表的政務司司長張建宗，宣佈1月24日起，高鐵旅客須提交健康申報表，但病毒已隨新春旅客魚貫而入。區結成說：「署理特首用形容詞搭夠，話會『極之緊張』，『一定會走多步』，無助大家理解疫情動向。」日前張建宗出席立法會緊急質詢時，更指疫情已受控，香港大學感染及傳染病中心總監何栢良斥其大錯特錯。
「如果停咗高鐵，我哋就冇香港頭果5、6個外來個案，亦可能冇咗嗰幾個個案帶嚟嘅社區傳播；同樣你話封兩個口岸唔封三個，如果你嗰下已經做14日強制隔離，人流可能早一個星期已經減少，場仗又唔一定係咁打。」區結成認為政府每每待疫情升級，才行一步，「判斷時機要用幾大力度出咗問題」，公眾信心變得非常薄弱。「我喺醫院做過風險管理，知道拿捏係難，但無論政治定科學或醫學聲音，共識係相當大，（封關措施）早做係好過遲做。」
口罩時戴時唔戴 風險溝通完全失敗
戴不戴口罩，今次武漢肺炎疫情中，竟史無前例地爭論了近兩個月，「政府今日戴晒口罩見大家，聽日就唔戴，後日就有啲戴有啲唔戴，咁咪好亂，公眾咪好徬徨囉。」區結成解釋，應付特大事故，政府須講解風險去到甚麼程度，應對方法是甚麼，「完整的指導式聲音要好快形成，而且權威專家同政府要一致（consistent），但今次係見唔到呢樣嘢。」
政府失信，市民人人自危，有基層市民買不到口罩，惟有用晾曬或滴露消毒等方法，重用口罩。「市民（亂到）不可開交時，你就話要回歸醫學，回歸理性，但本來係政府要做主導，你冇做到就好似教訓人咁，好似叫人唔好情緒化，唔好政治化，咁呢個（抗疫工作）未開始已經輸咗一半民心同情緒。」區結成留意到，2月頭政府宣傳片仍未提及口罩，「仲講緊止暴制亂，勿摸活家禽。注意社交距離同口罩嘅使用，新加坡一早做咗。」
「大家覺得你有一個game plan，你有呢種旗幟分明訊息，就會安頓到人嘅情緒；而你冇，變咗每一個訊息公眾同你拗一次，因為你冇我可以相信嘅大訊息，所以我逐件事同你拗，包括要唔要戴口罩，邊幢大廈做隔離等。」
03年香港似今日武漢
17年前沙士一役，是香港人和全體醫護人員的夢魘，醫護人員缺乏裝備，隔離病房不足，前線壓力爆煲，一幕幕又重複上演。區結成2003年在九龍醫院做康復科部門主管，負責統籌抗疫，「03年香港似而家武漢，全世界最慘重係香港，當咗香港係疫埠。」
「香港而家個情況並唔係情緒差過03年，係表現出嚟強烈反應差過03年，包括超市搶購同炒賣口罩，好似一種虛怯，不信任感覺好強烈。」反修例運動造成的創傷仍在，「我真係覺得我哋今次係帶住傷去抗疫。你講同心抗疫，同舟共濟，6個月前有機會講時都冇講到，咁你打完（市民）咁耐先講萬眾一心，甚至講放低歧見，市民會話，你又冇放低歧見唔去起訴人？」脫下白袍多年的區醫生，如此診斷整個社會的創傷，他仍在為港人尋找解藥。
區醫生答應記者採訪前，先詢問記者和攝記的同住家人可曾到訪內地，以及其他高危地方。他解釋說，武漢肺炎患者有輕微病徵都可傳染，大眾應減少接觸陌生社交圈，若真的需要接觸，可查問對方14天內曾接觸的人，以評估風險。若有一定風險則保持距離和避免同枱吃飯，他建議市民都可以這樣做：「成本可能比撲口罩撲洗手液低，但一樣減低咗風險。」
