2020年3月15日 星期日

左丁山 : 新加坡「智者千慮,必有一失」



與校友A及師弟C在陸羽飲茶,聽師弟C在東南亞搶口罩之事,方知國際口罩市場得貨為王,師弟C老友本在印度訂咗一批,但將近上飛機之時,印度政府宣佈禁止口罩出口,於是買唔成。新加坡政府貿工部部長暗地嘲諷香港官員無能,當然係事實,但新加坡政府又叻過頭,信心太過爆棚,搞到現在成為新冠狀肺炎疫區,確診數字多過香港,所以官員夠叻都冇乜用。
為何如此?校友A係做events生意嘅,即係幫客戶組織國際會議、論壇、晚宴、大型演講會等等。本來生意訂單幾好,但今年頭兩個月,幾乎所有events取消,或者無限期延遲,令到校友A悶到一個人去馬會會所打籃球。香港接連取消大型會議,但新加坡政府以為正好趁此時機搶走香港嘅MICE生意,大型會議照常舉行,唔好彩碰到有強國人在會議傳播病毒,又由一個英國人帶到法國滑雪,令西班牙、法國、英國皆有武漢肺炎事件,新加坡更係直接受害者。新近有一單係湖北女播毒,新加坡網上消息(已全球皆知)話湖北女係專業搵食女性,搞到新加坡政府要追查湖北女「半點朱唇萬客嘗」之恩客名單,分分鐘鬧出家庭不和事,師弟C話:「一啲都唔奇,我做旅遊網頁,知道新加坡東海岸某區有風月場所,東岸係基層區域,不少人幫襯公竇、私竇,近年當然有中國靚女在該地營生!」

新加坡官員係比香港官叻一皮,但在新聞不自由社會,政府始終「智者千慮,必有一失」,莫奈何!
校友A新年到日本滑雪在滑雪區曾經想上網訂一批滑雪口罩來港,但供應商在波蘭,聲明香港海關禁止呢款口罩入境,買唔成。一位大學教授太太最近來短訊云:「朋友之子在倫敦買了一批口罩交由DHL運回香港,遭香港海關扣留,理由係與蒙面法有關!真唔真呢?」校友A話有聽過同類事情,但最近香港海關大概覺得扣留口罩會畀市民鬧到爆,已悄悄放行。海關禁口罩入港,當與去年之社會運動及蒙面法有關。特區政府失道,上天唔會加以援手,但既然已就蒙面法上訴,好似有騎虎難下之勢,林鄭特首實在尷尬!當日力主推行蒙面法之建制派,今日唔知身在何方,仲敢講嘢咩,當內地地方政府嚴厲要求老百姓戴口罩,否則有防疫警察懲戒之際,香港特區政府何不乘機撤回蒙面法!