為了口罩，八千人通宵排隊瞓街，這個政府太仆街。政府無能，每每顯得民間有情。
中共多難興邦，際此多難穿幫。港共政府無能無恥，香港人則名副其實，多難興幫，自救也救人，互相交流沒口罩可以怎麼辦。港人自利，沒錯，但自私不等於自利，每到關鍵時刻，真香港人必然展示患難見真情。以下故事從柳俊江臉書看到，看完眼眶通紅，真想高歌願榮光歸香港。
話說巴士內有一婆婆與中年婦女沒戴口罩，旁人側目。乘客終於開腔：「外出要戴口罩啊婆婆。」中年婦女羞愧地說：「唔好意思，我哋買唔到口罩啊。」其他人說：「無口罩就唔好出街啦！
中年婦女道歉：「唔好意思，唔好意思！我哋有少少事要去醫院。」
眾鼓譟：「嘩，醫院！」中年婦女連忙澄清：「唔好意思，唔好意思！我媽有腎病，我哋去醫院洗腎而已。」未幾有人說：「你哋咁樣零保護出入醫院唔掂㗎喎，高危㗎。」有人說：「都話買唔到口罩咯！你估人哋想嘅咩？」有人說：「醫院唔派嘅咩？」有人說：「邊有？醫護都唔夠！」你一言我一語間，一名阿叔掏出用密實袋包裝的口罩乙個，豪氣干雲：「我預多了一個一陣夜更替換，送你！」中年婦女滿面通紅答謝，接過。接着，帶着餸籃師奶也掏出一個：「你媽有，你也要一個，否則是但一個感染都唔掂。」有有心人再問：「你阿媽每星期要洗幾多次腎㗎？」答案是：「三次。」隨即眾聲喧嘩：「口罩供應我看二月底才能穩定。」「穩定也不是人人買到！」「阿婆唔識上網睇口罩消息㗎喎。」「這幾個星期點捱？」「都話家中如有超過一星期供應嘅口罩就送一個畀有需要嘅人咯。」結果，車上一人攞一個出來，一人攞一個，一人攞一個……好快，中年婦女手上已堆滿十來個口罩，熱淚盈眶說：「夠了，夠了，多謝大家，多謝大家！」眾七嘴八舌：「我用少一個唔使死！」「你需要多啲！」「唉，自私無用，一日仲有人有事，一日未安全！」「香港人，守望相助。」「自己香港自己救！」
此事高潮來了，有位蒙面人，不知是誰大大聲喊道：「我話你知，香港人，無事無幹時利欲薰心，一有事，全世界最有義氣！所以我話你知，香港一定唔會死！」市井阿叔：「X！香港梗係唔會死，我同你哋講，我哋大家都～唔～X～准～死！」
口罩短期內仍看不到曙光，但，我信，真香港人，不會死，若輸給一個柒婆，堅決～唔～X～准～死！
