《十年》本來是香港一部獨立電影，香港人向來都唔太重視獨立電影，但經過口碑，輿論傳播，更因題材受到黨報《環球時報》「青睞」，之後更因入圍今年「金像獎」而令大陸封殺下令唔準轉播，令本來唔識《十年》嘅人，都反而知道呢部電影嘅存在。
其實《十年》由上年12月上映至今，都係3個月多少少，50萬成本，卻成為香港人口耳相傳下嘅口碑電影，喺街頭放映場場坐滿人，更奪得今年金像獎「最佳電影」，黨媒實在「居功至偉」，一齊回顧下十年被封殺嘅時序:
2015年12月17日
被指包含港獨、國安法等政治話題嘅《十年》正式公映。最初只喺百老匯電影中心上映，其後UA同MCL院線陸續加入。
2016年1月初
《十年》上映以嚟，掀起撲飛熱潮，更場場爆滿，但最先上映嘅百老匯電影中心反而將電影下架，有網民指院商此舉係自我政治審查。
2016年1月22日
中共官媒《環球時報》發社評炮轟《十年》鼓吹反抗，係「思想病毒」。
2016年1月29日
金像獎公佈入圍名單，《十年》入圍最佳電影，連套戲嘅監製Andrew亦稱係一個奇蹟。
2016年2月21日
有消息指因《十年》入圍金像獎，原定直播頒獎禮嘅內地網站騰訊，向金像獎大會表明停播本屆頒獎禮，而獲電視播映權嘅中央電視台亦會停播，香港電影金像獎協會主席爾冬陞確認消息。
2016年2月23日
盛傳中央繼下令禁播金像獎頒獎禮後，年底舉行嘅台灣電影金馬獎，亦因應「台灣社會變化，防不符國情作品帶來不良影響」而遭到封殺。
2016年4月3日
騰訊同央視一如預期拒播金像獎直播，事後內地網站公布頒獎禮得獎名單，亦獨欠奪得最佳電影嘅《十年》。
2016年4月4日
《十年》奪最佳電影，有傳中宣部震怒，責怪有關單位辦事不力，更下令媒體全面封鎖《十年》。
