嶺大學生會昨舉行「校董Con Day（Consultation Day）」論壇，就廢除特首校監必然制、提高校董會內教職員及學生人數和嶺大發展等議題質詢何君堯，逾百人出席，火花四起。嶺大學生會會長劉振琳甫開場便批評，何曾呼籲校方解散學生會、又稱呼別人為「廢偽社工」，質疑他的人格。何指會謙虛地與學生交流，但又批評劉不求上進，曲解其言論，促對方做好資料搜集，「我之前已經回應晒你啲指控，請你同我講嘢前至少查下維基百科」。
叫學生「返去讀多啲書」
論壇上學生幾度質問何有關捍衞學術自由及提升校董會教職員及學生比例，何無正面回應，只稱「要睇下研究報告先決定到可唔可行（提升比例）」，又稱公事繁忙無暇干預學術自由，「唔通突然叫個教授畀份卷我改咩？」
學術自由學者聯盟兼嶺大教授陳清僑在場指，本港學術自由受干預，何說指自己未聽聞，反指學界的確有事發生，矛頭是發起佔中的一位港大法律學院教授，何斥他教學生破壞法紀，又批評港大法律學院前院長陳文敏錯誤理解他鼓勵僭建。
對於有人稱呼他為「梁粉」，何稱自己「唔係梁粉，都唔係河粉、米粉」，無政治立場。有學生斥何多次搬弄文字，無資格做校董，「你之前話自己係『社會工作者』，今次就話無立場，有邊個信？」促其清楚交代政治背景，何聞言後幾度請同學勿鑽牛角尖，「你點知有一日我唔會成為一個真正嘅社會工作者呢？」又指他被委任為校董已成定局，叫學生「返去讀多啲書」。
不少同學繼而向何報以噓聲，亦有人批評他扮謙虛，爆粗鬧他「巴Ｘ閉」。何反擊稱不會和講粗口的學生對話，「可能大學生之間鍾意用粗口打情罵俏啦！」劉振琳指何言論侮辱學生，反問：「你係咪會用粗口同你老婆打情罵俏？」何聞言立即「黑面」拍枱離開。
何向記者指聽到有人攻擊自己家人，感到憤怒，斥在場學生違反博雅精神，「希望佢地唔好行條歪路，我今日高興咁嚟，憤怒咁走」。劉振琳澄清並無攻擊何家人，反而何態度囂張，「不斷遊花園」。
何君堯與學生對話摘錄 :
學生Chris：「如果香港市民唔想你做校董，會唔會下台？」
何：「你係納稅人咩，有咩資格叫我下台？」
學生會長劉振琳：「佢維護僭建者利益，呼籲新界人唔好參與政府嘅自願登記僭建計劃。」
何：「我冇鼓勵人僭建，陳文敏連呢樣嘢都唔明，連電話都唔打畀我就喺報紙批評我，對我好大傷害！」
同學：「你嚟論壇已經咁唔尊重學生咁巴X閉，做咗校董又會聽意見咩？」
何：「我唔想同你對話，可能你哋同學慣咗用粗口打情罵悄。」
