2021年3月19日 星期五

講『檢測』實際推銷『電子交易』

李八方:講『檢測』實際推銷『電子交易』, 陳肇始撈過界?2020-09-07

https://hk.appledaily.com/local/20200907/XPNGDTBAM5D6LG623CVSEFFDFQ/ 

今次武漢肺炎全民檢測,特首林鄭月娥將負責領導計劃嘅重任交畀愛將公務員事務局局長聶德權,至於真係關佢政策範圍事嘅食物及衞生局局長陳肇始,就只可以企喺一邊幫手。陳肇始噚日上電視節目講檢測,點知講講吓講到用現金有傳播武肺風險,話要研究推進非現金交易平台,有網民見到就問,呢樣乜唔係金融管理局負責?陳肇始想撈埋金管局嗰瓣?  

陳肇始噚日接受無綫《講清講楚》訪問,講到第三波疫情教訓會否影響日後放寬防疫措施底線,佢話一定會小心,以後唔同處所或者都要納入預防感染措施,佢以街市為例,話畀現金有傳播風險,所以當局會研究推進唔用現金交易嘅平台。 

有網民睇到即刻問,咁係咪即係要將大陸即將推出嘅官方電子貨幣,好似健康碼咁借頭借路推嚟香港?又有人話呢瓣嘢係金管局睇,點解又因疫情關埋陳肇始事?𠵱家講緊第四波疫情可能年尾爆,唔通個唔用現金交易嘅平台幾個月就搞到?