多名年輕社運人士和雙學三子上月相繼被法庭上訴庭改判即時入獄，事件除了引起社會對法庭判決的討論，亦令不少人關注公民抗命的議題。網上瘋傳伊利沙伯中學舊生會湯國華中學的學生會會長，周五在學校開學典禮上致辭時公開撐良心犯，稱雖然他們的處事方式或會被批評「唔夠體面」，但就教會青年要學會「堅持」。影片上載短短一日已有近3萬人次觀看過，更有過千人「畀Like讚好」，稱欣賞同學的堅持，「我為你的不夠體面而感到香港的驕傲！多謝！」
負責致辭的學生會會長湯錦婷是該校中六學生，她稱自己卸任學生會在即，希望以「學習做一個不夠體面的人」與同學分享，指過去曾被老師批評她「做人唔夠圓滑」，日後在社會容易吃虧，但她卻希望學生能在讀書時嘗試去做一個不夠體面、擇善固執的人。
湯提及其內閣的莊員曾在學校運動會開幕禮上背對中國國旗，「當時有好多老師話我哋不識尊重、不識大體。但喺，當面對住呢一個共産政權、面對住香港一日一日被破壞嘅自由之時，喺我哋有清晰嘅論述去解釋我哋嘅舉動時，我同我嘅一班莊員都堅持以唔夠得體嘅方式去表達我哋嘅不滿。」
她指明白「顧全大局、大方得體」有其好處，但更應珍惜面對真理的追求和堅持，「年輕人或者會以『唔得體』嘅方式，去堅守我哋心中嘅原則，不懂世故、唔夠圓滑，但係青葱歲月就容讓我們跌跌撞撞咁學會『堅持』呢一課，去守我哋嘅核心價值，學會做一個唔夠圓滑嘅人，即使會吃虧。」她最後祝願每個學生都可以成為自己心目中想要成為的人。
對於湯的致辭，不少網民都大讚有深度，「 呢個同學仔至係真正生活緊，我哋老坑都汗顏，希望成年人都以愛護同保護佢哋為己任」，有人直指青年除了要擇善固執，亦要學會尊重別人，不要盲做一個趨炎附勢、隨波逐流的「好學生」，又指如果香港有更多的人學會這種堅持，香港才會有未來。
不過，湯的致辭看在「藍絲」眼中大逆不道。親建制網媒「香港G報」發文炮轟學生說話偏激是「政治上腦」，更公然侮辱國旗和爭取港獨，質疑「沒有師長支持這可能嗎？」認為學生已被「黃絲老師」成功洗腦。文章更指湯在台上鳴謝的老師張兆聰是教協理事，指張曾形容特首是「壞人」，呼籲家長要想辦法「救救孩子」。
翻查資料，去年時任教育局局長吳克儉曾到訪過該校，當時湯與過百名學生曾在校門外包圍吳的座駕要求對話，但吳並無理會學生訴求，只顧坐在私家車內「玩手機」個半小時仍拒見學生，湯曾急至激動落淚，吳事後反駁自己是在車上用手機「處理公務」，又指在場有很多外人，不適下車見學生。
湯錦婷同學致辭全文 Sep 2, 2017
我好幸運，今日有機會可以同大家去講一番說話，讓大家可能因此而有唔同嘅想法，或者能夠對你哋帶嚟唔同嘅影響。
諗起每年典禮上校長同各位學生領袖透過演講鼓勵同學努力發奮，我自認為自己喺學習上面無乜資格做呢類既分享，上年最叻係聚集咗一批關愛學校、關心社區、關注香港既同學組織內閣參選學生會，勝選後一步一腳印咁履行競選承諾，至於功過，就留待各位同學去評價。而我哋喺當中有唔少反思，想同大家分享。
今日想分享嘅主題喺「學習做一個不夠體面的人」，記得去年家長日嘅時候，我嘅班主任同我家長講我做人唔夠圓滑，雖然咁嘅性格都有好嘅地方，但將來出到社會會非常吃虧。然而，我反而認為大家都應該嘗試去學習做不夠體面、擇善固執嘅人。仲記得學生會去年爭取外出午膳計劃，我同我嘅莊員反反覆覆咁將計劃同校方傾咗好多次，將我哋認為唔合理嘅地方要求校方解釋。呢一啲行為，喺好多成年人眼中都喺不識妥協、不識大體嘅表現，但喺如果當初我哋唔作出同一個選擇，我都唔能夠保證今日個計劃仲會唔會實行。仲記得喺學生會任期期間，就住不同活動事務，我同兩位顧問老師都有過唔少爭執，喺傳統思想上，去反駁長輩，會被認為喺唔得體、無禮貌嘅表現。然而，正因為我嘅不夠體面，令佢哋明白咗我嘅想法，明白咗我嘅堅持，從而讓我哋都可以互相理解。仲記得運動會開幕禮上，凝燃莊員背向中國國旗呢件事，當時有好多老師話我哋不識尊重、不識大體。但喺，當面對住呢一個共産政權、面對住香港一日一日被破壞嘅自由之時，喺我哋有清晰嘅論述去解釋我哋嘅舉動時，我同我嘅一班莊員都堅持以唔夠得體嘅方式去表達我哋嘅不滿。
環顧今日，社會上有好多年輕人以「唔夠體面」嘅精神去堅守佢哋嘅信念、以「唔夠體面」嘅精神去守護住佢哋熱愛嘅家園、以「唔夠體面」嘅精神去面對艱難嘅人生。很難相信直到今日，一共有24名政治犯被囚禁。佢哋或者就係以「唔夠體面」嘅精神去爭取香港民主、獨立、自主、自決。呢一班年輕人可能會被社會大眾批評佢哋不識大體，甚至漠視佢哋為改變社會所作出嘅努力，選擇同佢哋切割。但佢哋都會堅持住以自己嘅力量去對抗種種來自政權嘅打壓。我知道顧全大局、大方得體有佢嘅好處。但我哋更加珍惜心裡面對真理嘅追求同堅持，年輕人或者會以「唔得體」嘅方式，去堅守我哋心中嘅原則，不懂世故、唔夠圓滑，但係青葱歲月就容讓我們跌跌撞撞咁學會「堅持」呢一課，去守我哋嘅核心價值，學會做一個唔夠圓滑嘅人，即使會吃虧。
任期將滿，今次喺我最後一次以學生會主席身份在此致辭，亦藉此機會，再一次感謝凝燃每一位助選團成員、感謝每一位信任凝燃嘅同學。感謝兩位顧問老師，高柱堅老師以及黎劍鋒老師。以及每一個幫助過我哋、支持過我哋嘅老師。特別要感謝張兆聰老師給予過我嘅鼓勵同每一次我懷疑自己時，給予給我嘅信心。感謝凝燃嘅一班莊員，兩位畢咗業嘅顧問，喺呢一個任期內嘅付出同努力，感謝你哋同我一樣咁傻咁堅持，無你哋就無凝燃。希望大家可以將掌聲給予我嘅一班莊員，感謝佢哋呢一年對學生會以及湯中嘅付出。
最後，在此祝願各位同學，希望我哋都可以成為我哋心中想要成為嘅人。並喺呢一年享受校園時光。多謝。
