■91歲許行民主心未死，現仍為支聯會搞雙月刊
銅鑼灣書店股東及職員「被失蹤」，再令人關注在港出版揭露中共內幕書籍的出版商安全，八方最近見過創辦《觀察家》、《南北極》及《開放》雜誌的老一輩政治評論員許行。
講佢個名，後生梗係話未聽過，但係講民主，91歲許老先生同年輕人一樣熱心，佢十幾歲開始熟讀共產主義，最終寫反共文章近60年，移民加拿大溫哥華近30年，同《百姓》雜誌創辦人胡菊人好熟。
兩人喺七十年代曾經聯同李歐芃、劉紹銘、司馬長風、胡金銓同埋費明儀等，每人夾4,000元開辦《南北極》，結果4個月就蝕錢散檔。好彩許老當時懂得做日本布料代理，賺埋貼錢搞雜誌，呢啲叫理想。
講到香港時局，佢勉勵年輕人爭取民主不會冇結果的，看台灣就知，佢反而擔心《蘋果日報》，「中共勢力非常大，傳媒只剩你們《蘋果》，其他差不多死晒。」講到李波事件，「我都好擔心黎智英有天被人綁架。」
老人家，為民主從未心死，前年雨傘運動期間回港，坐着輪椅都要去金鐘走一趟，仲努力增訂新書《百年中國民主滄桑》（田園書屋發行）。
許老𠵱家身體好好多，精靈活潑，仍然為支聯會搞一份雙月刊。不過胡菊人因為早年中風，已經少出席文化界聚會了。
