有指自10月1號之後，有大量市民將港元兌換成外幣。
往日去找換店兌錢，大多數人都是準備旅行，今日去找換店，有人卻是準備「走難」。有老人家甚至將床下底啲紅衫魚、金牛，轉做美金，求個安心。發達鳥找換店店主王偉霖（Eric）同華華講，生意多到做唔切。「以前啲客後生為主，現在有六、七十歲伯伯，拎住自己畢生積蓄過嚟，銀紙係紮到一卷卷。」
Eric表示由6月起，每次大型示威之後，唱美金嘅客就「幾何級」咁上升，近日找換店平均每天收到500個電話及WhatsApp，查詢有關兌換美元詳情。
最初客仔都只唱幾千、幾萬港幣，但10月1號之後，有客人啲錢大嚿到要抬，「不只是數十萬港元，而是50萬或100萬港元，他們要求兌換100美元現鈔，其餘面值細額的美元也不要。」有部份客戶兌換不到美元，退而求其次，日圓、歐元和瑞士法郎都照殺。生意雖然多，但Eric不是「發達了」，「現在好難拎到美金現貨，譬如7.846攞返嚟，有時候係平手賣返出去。」
