http://hkm.appledaily.com/detail.php?guid=19968929&category_guid=vice&sup_id=12187389&category=daily&issue=20170325
疑似中聯辦發出支持林鄭月娥參選的通知
明天就是特首選舉之期，三人競選做第五屆特區政府行政長官，分別係1號曾俊華，2號林鄭月娥，3號胡國興，究竟邊一位候選人會領導香港迎接未來五年嘅挑戰，決定權表面上落在1194名選舉委員之中，實際上就係中南海策動及傳令中聯辦執行，香港市民睇香港選委做戲做一場投票騷而已。
左丁山在本欄不止寫過兩三次，1992年左丁山陪大老闆在報館接待新任港督彭定康之時，曾討論過香港未來之選舉方案，當時肥彭有講：「中共會為香港搞選舉，但在跑馬仔閘門未打開之時，佢要知道邊隻馬必贏。」
回歸後有董建華、李福善、楊鐵樑、吳光正競選，又有曾蔭權、梁家傑以及梁振英、唐英年、何俊仁競選，除咗梁唐廝殺到最後階段之外，其餘兩次都係事先知道邊個會贏嘅。今年呢次競選本以為會係建制派自由搏擊，邊位當選都唔會有越軌行動嘅啦。點知到了最後，中央仍然要在三位建制派之中，弄出敵我矛盾，愛國報館發動寫作班子，數臭曾俊華，說他千般不是，林鄭月娥就萬千寵愛在一身，成為欽點特首。究竟點解要咁，我地局外人完全莫名其妙。咁嘅動作，既傷害曾俊華，兼唔見得對林鄭月娥有甚麼好處。好呀，林鄭明日會係篤定大熱門取勝，未出閘已知結果，但一位本來形象唔錯嘅政務官以後一生蒙上欽點特首污名，講出嚟都唔馨香，就職後佢冇龐大心理壓力就係奇蹟，為求表現，施政手段過激，一啲都唔奇。
上個星期跑打吡，沙田馬場萬人空巷，著名愛國商人洪祖杭隻「佳龍駒」大熱取勝，一位馬迷話：「洪先生利用外國勢力贏打吡喎，練馬師係澳洲人，騎師係巴西人！」騎騎，馬場就有呢個好處，充份全球化，並無保護主義，總之馬會馬主用人唯才，世界頂尖騎師雲集沙田爭大賽錦標。馬迷無分本土派崇外派，總之就為冠軍人馬歡呼，擁抱外國勢力。曾俊華就慘咯，只因曾跟父親移民美國，做過美國人，在美國讀書，就被視為外國勢力，被一棍打殘。打吡日跑馬落注之餘，不忘問一位選委馬迷：「點投票呀？」選委苦笑：「收到幾次電話嘞，講明國家需要我的一票，國家認為2號係最適合人選喎！」2號唔係話過冇請別人代為拉票嘅咩？選委話：「或者佢都唔知道有人打電話呢，天真到會以為自己真係有魅力㗎嘛。」既是不記名投票，在電話應承咗唔算，得唔得？好彩自己唔係選委。
