2017年11月13日 星期一

左丁山 : 公務員學院洗腦

昨日所講之飯局,除大家講遊覽伊朗,遊覽柬埔寨及到台中聽音樂之外,還有老友記要討論施政報告第15段,係講「新的公務員學院」嘅,大家立即上網找出施政報告第十五段睇真啲:
「香港的公務員向來是一支專業高效的團隊,但我們必須透過加強培訓,精益求精。公務員須擁有高瞻遠矚的視野和不斷創新的精神,以面對不同的挑戰,做好政府作為優秀『服務提供者』、『監管者』、『促成者』和『推廣者』的角色。我建議在香港設立一所全新的公務員學院,全面提升培訓設施,從而加強公務員在領導才能發展、與市民互動溝通、創新及科技應用等範疇的培訓。新的公務員學院亦須注重加深公務員對國家發展和中央與特區關係的認識,增強公務員的國際觸覺,並促進與其他地區的公務員互動交流,分享本地公共服務管理的經驗和心得。」
過去政府培訓公務員,有不同訓練班,政務官就送往牛津劍橋讀書上堂,例如林太未嫁之時,回歸後就不去英國了,有改去美國著名大學,當然北京清華大學或國家行政學院國情班已成為必修科,這次林鄭要在本港加設公務員訓練學院,究竟有何目的?

傳媒C特別敏感,搶住講:「即係開黨校啦,15段講到明要注重加深公務員對國家發展和中央特區關係的認識,邊個負責教導呀?十成係自北大清華搵人落嚟,或一班基本法委員會委員,唔通會搵中大港大政治學教授呀?」聽落又難以反駁,將來AO就成班人上清華,EO及專業部門官員咪在本港聽建制派律師、經濟學家及內地教授上堂發表偉論囉。中共組織部提升人員之前,一定要官員入黨校受訓,政治思想過關才可能得到提拔,未來香港公務員進入公務員訓練學院,上完堂唔通唔使考試或寫報告,拍拍屁股鬆人就算交差?唔會嘞,一定有某種形式嘅考核,寫報告時唔講底氣講雷氣,引用蘋果而唔引用環時,等調去水塘做管理員都唔係冇可能。

大家不妨牛咁眼睇住,將來公務員訓練學院搵法律界人士講基本法與本港,會搵胡漢青何君堯吖,還是也叫埋余若薇何俊仁去講一份?此外,公務員訓練學院還要教導公務員如何做服務提供者、推廣者、促成者,又係要洗腦。左丁山有啲校友做公務員,現在當然已經退休,以前叫佢哋出嚟食飯,參加校友活動,佢哋一概推辭,話:「公務員唔搞應酬。」咁嘅態度,點做得成「促成者」、「推廣者」呀,要佢哋呢班舊公務員作風,全部清除至得。以前左丁山講過香港公務員本質上難以干預經濟運行,皆因本地公務員傳統係:「積極不干預」,現在林鄭要打破這公務員文化,唔洗腦點會成功?