■有大學生在六四遊行呼籲市民繼續為民主發聲
26年過去，今日教導六四歷史的老師，逐漸由未經歷六四的老師接棒。90後通識老師陳先生直言教六四時少一份民族情感，「你好難喺冇回憶底下講感情，嗰班人真係冇回憶，我自己都係1989年後出世，你要我對件事有好強情感，本身係扭曲情感呢樣嘢」。他的六四課堂少了老一輩的兩行熱淚，更注重分析六四對香港和中國民主發展的影響。
陳Sir於1990年出生，首次去六四集會是2008年，首個印象是「點解咁多人籌款、集會好慢、大台講嘢聽唔清楚」。近3年他沒有去六四集會，覺得太儀式化，由上而下的模式忽略參與者。
他的教席屬合約制，故不敢露面接受訪問，但執教鞭3年間，仍與學生討論六四最新議題，例如學聯不出席六四集會，「我最基本底線係呢日你要思考吓六四呢件事，思考呢件事同你身處香港嘅關係，已經好足夠」。
平反六四非優先議題
期望低，因為坐在課室的新一代是千禧後，對六四的包袱更少，某次六四論壇參加老師比學生多，學生僅兩成人去集會，他反問：「我哋仲執迷只要講學生就會聽？」他認為六四對上一代是全城回憶，但新一代沒有經歷過，會質問有何關心意義。
他指學生對平反六四沒有上一代的執念，學生纏着老師激辯的是雨傘運動去向，「你叫佢哋好似李卓人、華叔咁行上前線，年年講平反六四？佢會覺得平反到就平，但係咪作首要爭取或者好優先議題？我諗唔好講學生，我哋呢代人會有幾認真？」
很多學生參與雨傘運動，他覺得已植根了民主理念，「佔中新世代係好明確一代人。有幾多人對政黨、中央政府、港府同警察唔認識呢？我諗係絕無僅有。」維園燭光燃點26年，他認為新一代看六四的中國情懷漸褪，雨傘運動成新的集體回憶，「係屬於我哋呢代嘅集體回憶，然後我哋呢代又會好熱心分享番畀下一代知，但希望到時唔會有另一個運動發生，真係有真普選」。
