好打得 (政務司司張林鄭月娥) 搞乜嘢早餐飯局，好似做咗聯合國秘書長之調停角色，請晒唔同派系之人士出席，希望可以食碗粥拉近距離。坦白講，中環 (香港特區政府所在) 離開西環 (中聯辦總部) 有幾遠？西環一家海鮮酒家，基本上係西環設宴款待不同人士之地頭。中環飛的士去都唔使十五分鐘。真係要傾，飛的士就到啦，唔需要刻意要好打得做東食早餐。
外面好多人覺得，其實政改都只係嗰幾個民主派大老嘅事，只要同幾個大老傾掂 (作枱底交易)，分歧越收越窄，但唔知佢地真知定假知，好多關節位，已經唔係幾個大老話事，而係，好多大老，都要面對黨內新一代之意見，唔可能好似當年華叔 (已故民主黨前輩司徒華) 咁樣，可以一槌定音。
試舉一個例子。依家民主老師團體有選舉，以前華叔響度之時，一支大槌搞掂晒，主流聲音素來佔晒上風。但今屆出現咗相當對抗性之選舉，搞到主流嗰啲要赤膊上陣。選舉嘅嘢，未到最後一刻都唔知結果。好啦，即使將來主流聲音繼續贏咗，佢地會feel到，今時唔同往日，唔可以唔照顧，內部極之對立嘅聲音及意見。
同一道理，大家唔好以為，依家枱面上之民主派大老八面威風，查實佢地好多做埋今屆，甚至選多一屆議員就真係要交棒，唔可以唔交出權力。唔通 (莫非) 做到八十歲仲雙料議員咁老土咩！從呢個角度講，佢地依家做嘅決定，係會影響下個世代，甚至再下個世代之接班，唔可以咁自私也。
下個或者再下個世代對中國之態度係點呢？佢地會唔會好似依家大老輩咁樣，對中國有好大之情意結呢？佢地會唔會咁民族主義上腦呢？佢地會唔會好似華叔嗰輩愛國不愛黨呢？佢地同中國有乜嘢連繫呢？佢地嘅「中國因素」係乜嘢呢？
我唔係屬於呢班年輕一代，我都好尷尬，夾在中間。年輕一代點樣睇中國，一定程度上影響緊大老們的決策。萬一呢班青年好唔鍾意大老們北上訪問，你估大老們敢唔敢大動作到，唔理黨內意見又監粗北上訪問呢？當然，民主派大老個個做慣大佬，把口一定好權威咁樣訓斥年輕一代太幼稚等諸如此類，但心底裡都feel到，決策唔可以再係咁樣唯我獨尊，畢竟下一代殺緊上嚟，唔可以獨裁到成個亞努科維奇咁樣。唔好忘記，有些民主黨派，依家要交棒的話，一交就交畀八十後。真正有能力嘅六十後及七十後嘅人士好少，甚至出現咗白宮發言人呢類極品。
所以，依家 (現在) 傾政改，除咗係枱面呢堆民主派大老之外，佢地黨內嘅下一代以及下下一代之想法亦好重要。但係，依家西環同中環只係做大老之功夫，但就唔見佢地做下一代或下下一代之功夫，咁就好明顯見到，佢地工作之缺失。北方人士(中共) 可以搵詩姐 (前律政司梁愛詩) 或好打得 (現任政務司司張林鄭月娥) 同班民主派大老傾，但派乜嘢人同班後生 (年輕一代民主派) 傾？傾唔掂後生嗰班，到時即使大老輩算係傾掂數，但後生嗰堆響EGM或周年大會至同班老餅逼宮開片 (攤牌)，到時仲頭痕，係唔係？好現實咁講，2015同2016選舉，民主派大老冇呢班後生支援，點選呀？
