物以類聚
http://hk.apple.nextmedia.com/supplement/columnist/art/20150328/19092408
■ 中國國家副主席李源潮，香港特區前任「總書記」董建華，將出席周日舉行的李光耀國葬
香港有不少人留學劍橋牛津，之後回港服務，點解出唔到一位李光耀咁嘅人物呢？與李光耀坐同一隻運兵SS Britiannic船去英國讀書嘅香港人，據知有大名鼎鼎嘅余叔韶大律師（牛津），及已故大法官李福善（UCL），兩位返到香港都對法律界極有貢獻，但係限於環境。大家心知肚明，當然唔會走上李光耀從政之路。
甚麼環境？李光耀曾經講得非常清楚，就係如果將香港島拖離到達中國海岸幾百哩外嘅太平洋，香港或者有民主，講自立嘅條件。睡在老虎旁邊喎，乖乖地認命啦。香港歷年來咁多叻人，一早唔需要李光耀提醒，對呢一點知道得非常清楚嘅。李光耀原籍廣東梅州客家，但曾祖父在19世紀已移民星洲、發咗達，老早送子弟接受英式精英教育，脫離中國祖宗遺訓，佢16歲在萊佛士學院畢業（與郭鶴年係同學），考到劍橋高級試之中嘅馬來亞（包括新加坡）第一名，本計劃起行到劍橋讀法律，但遇上二次大戰爆發，不能成行，滯留在新加坡親眼目睹日軍殘暴殺人，少年人開始知道世界可以係幾醜惡，心中留下烙印，亦領略到為了求生，一個人可以去到幾盡。故此當佢從政掌權之後，佢曾經講過 If you can hurt me more than I can hurt you,
try. There is no other way you can govern in a Chinese society（如果你以為可以傷害我多過我傷害你，試吓吖！管治一個華人社會，捨此別無他法！）
佢嘅意思即係話，管治華人要以牙還牙，雙倍奉還，令人恐懼怕死怕痛，係唯一嘅方法，毛澤東就係用呢一套不斷批鬥臭老九搞到中國知識分子死去活來，不敢言反。但李光耀令人迷惑之處，不只係佢好明白華人心態，在美國人面前，佢又係非常反共親美嘅，新加坡在一九六〇、七〇年代，教育去漢化（封閉、改造南洋大學，貶低新加坡之中文教育系統），到咗近20年，就大力推廣中國普通話，講儒家，目的係為咗在中國大陸投資與中國做生意。背後呢，就開放港口俾美國第七艦隊出出入入，警告美國不可退出亞太區讓中國有權力真空可填補，要求美國勢力留在亞太以平衡中國南進。李光耀曾經向美國漢學家 Joseph Nye 講中國有13億人才，但只有美國可以吸引全世界70億人才，以多元化文化將70億人融為一體，發揮無與倫比嘅創意，令漢人民族主義瞠乎其後。中國高度讚揚李光耀之時，不妨細味斯言。
