https://hk.lifestyle.appledaily.com/lifestyle/realtime/article/20190404/59441873
黃任匡作為公院醫生，敢於走到前線為群眾發聲，皆因太愛香港這個家
公院醫生黃任匡，近年常在鎂光燈下怒罵香港醫療政策制度、每日150個單程證湧港的禍害，去年他靜下來了，暫別亂糟糟的香港，退隱到世界第二的幸福國度──丹麥──深造。今年初回港，他曾經想「摺埋」，最後還是為愛為責任「重出江湖」。他自稱半社運人士，高調走到前線發聲，並非為選舉從政鋪路，只單純為香港這個屋企出一分力，「我唔享受搞政治，我都係鍾意做醫生多啲。」黃任匡如是說。
三十七歲的黃任匡，矢志走上杏林路，緣於中六那年一場大病，「患咗肺結核，瞓瞓吓嘔一大灘血，入醫院兩個月，我成日諗唔係有醫生護士救返，應該死咗好耐，就諗如果第時可以咁幫返人都幾好。」高考取得3A2B，順利考入港大醫學院。
講士氣 現時仲差過沙士
2003年沙士爆發，時為醫科生的黃任匡，見證過醫護界當時的艱難歲月，他說那時士氣雖差，但也比今時今日好，「我相信辛苦唔係最大原因，老實講，入得行預咗辛苦，主因係大家見到制度唔公平，見到公公婆婆心臟病，要通波仔，但畀唔起錢，政府又畀唔起錢、或唔肯畀錢醫，寧願拎六千億去起人工島，幾億起個噴水池，作為醫生梗係唔開心啦，好多同事越做越灰心，係好氣餒，挫敗感好重。當你做到飯都冇時間食，尿都唔得閒屙，然後見到上面啲人派魚蛋燒賣，拍片叫譚詠麟唱歌畀你聽，點會唔想走？」係囉，咁點解繼續留低？「啲老人家已經好慘，走咗佢哋咪仲淒涼。當你見到病人慢慢好返，過返正常生活，嗰種滿足感係再多錢都比唔上。回歸讀醫嘅初心，都係想幫人啫。」
每次醫護人員出來吶喊，總有人揶揄：「你哋人工高福利好，嘈乜？嫌辛苦咪唔好做。」黃任匡每次都急着幫大家澄清：「其實唔係嗌辛苦，係睇唔過眼，每次巴士、小巴發生意外，大家都先關注司機工時，但發生醫療事故就完全冇人提，我哋呢行，工時長係會涉及病人安全。」訪問前兩日剛連續上班三十三小時的他續說：「如果你瞓喺手術枱，知道我三十個鐘冇瞓覺，但拎緊把刀劏你，你驚唔驚？要記住，有事發生時唔係編更同事孭鑊，唔係食衞局局長陳肇始去坐監，而係負責嘅同事坐監或釘牌！」他補充，「我唔係話走咗啲同事自私，但我可以好肯定講，繼續留喺醫管局嘅都係最有心嘅同事。」
大控訴 建醫院齋睇急症
病房爆滿，病人要瞓走廊、電視底，黃任匡見怪不怪，他最嬲每當高官巡院前，院方總要求「洗太平地」。人手、資源不足等老問題，其實有辦法解決，但冇人做，或者不願做。近年新建的天水圍醫院、北大嶼山醫院，美侖美奐，但原來只提供急症室服務，大部份病房至今一直空置，何解？黃任匡說得激動：「你問得真係好，要問局長先知點解！呢個政府唔諗嘢㗎，俾人鬧完就起間醫院，但完全冇諗人手安排，醫療政策係要長遠規劃，唔係頭痛醫頭，腳痛醫腳。病人去完急症好多都要住院，天水圍冇病房就會轉介去屯門、博愛等邊境醫院，所以佢哋病房越來越爆。當然，呢啲新聞你唔會喺TVB睇到，民建聯都只會話你知佢哋成功爭取天水圍開急症室，yeah。我想話畀社會知，唔係只得人手問題囉。」
論打壓 我有退路餓唔死
近年香港瀰漫一股白色恐怖，冷不防會被消失，高調發聲，黃任匡直言擔心過被抽秤，「我都要搵食，養父母，但有時諗唔到咁多。」他說在香港當醫生是社會上優越的一群，「講得難聽啲，如果我真係有日被炒，最多咪去屋邨開間診所仔幫人睇傷風咳，餓唔死嘅。我有呢條退路時，就有責任去講普通打工仔唔敢講嘅嘢。比起一啲後生仔要坐監、被停學、斷送前途，我呢啲中產嘅所謂犧牲，又算得係乜？」他慶幸直屬上司很撐自己，雖然有同事會暗諷「你就嚟升喎，睇路喎，小心啲喎」，心理質素算是良好的他，會視為善意提醒，「我覺得好正常，社會係要有唔同聲音，不嬲都係咁，殖民地年代，大家都係咁鬧港督、事頭婆，係近幾年先變做一言堂之嘛。近年好多白色恐怖，我覺得最緊要唔好自己嚇自己，事事過份解讀。如果樣樣自我審查，就會中咗壞人圈套。」
有人問，如此高調，一定是為下屆立法會選舉鋪路，「冇咁嘅諗法，我都唔享受搞政治，我都係鍾意做醫生多啲。」有幾鍾意？「就係我今時今日仲留喺醫管局咁鍾意囉，要真係好鍾意先做到㗎大佬！你明唔明呀？」明晒。
冇歧視 上水變質好心悒
黃任匡在上水長大，屯門工作，現居天水圍，新移民對他的影響，多過你同我。「以前上水好少人，大學住宿舍時會諗，第日搬返去住都幾好，但而家上水已經唔係宜居地方，見到自己長大嘅社區變成咁，係好心悒。」那為何現在選擇住另一個新移民聚居地天水圍？他直言因為樓價平，「做醫生唔係想像中咁有錢，我哋買樓都好困難，我都係靠父幹，層樓首期由阿爸畀。我成日同師弟妹講，要發達唔好做醫生，快啲轉行喇。」每當社會談及新移民，總會與「歧視」扯上關係，他澄清：「我唔歧視新移民，歧視係做唔到醫護，我都唔抗拒住喺新移民社區。我甚至希望有一日可與新移民聯手，同政府檢討新移民及人口政策，畢竟對佢哋影響最大。好嘅政府係會訂立合理移民門檻，保障市民，但而家係大開中門，對一百五十個單程證不聞不問，然後鬧我哋做乜歧視，係好本末倒置。」
諗移民 要走嘅係共產黨
近年，幾乎人人想移民，雨傘運動時，黃任匡在佔領區做醫療義工，認識到一位台灣朋友，「佢話香港人成日自命愛香港，但一有問題就諗移民，有幾愛啫？」黃任匡說：「我成日諗，呢度係香港，要走點會係香港人走？梗係共產黨走啦，當然，呢啲只係晦氣說話。但始終係自己屋企，就算做唔到乜大改變，最起碼要留低拖慢佢變差嘅速度，唔係走咗去囉。」
他去年到丹麥深造一年，臨別時曾有上司叫他不如留低。醫生可做專業移民，要走，不難。丹麥，幸福指數全球位列第二，怎抵受得住引誘？「我皮膚唔好，有牛皮癬，壓力大就會爆發，去丹麥前諗住當地環境好、空氣好，一定靚晒啦，點知仲差咗！我諗係因為走咗後無力感更重，見到沙中綫又出事喇、馬時亨出嚟講佢話ok就ok，我就喺電腦面前咬牙切齒，人又不在港，做唔到嘢，會好忟憎。如果移咗民，我覺得我會頂唔順，結果忍唔住又返嚟香港。唉，賤骨頭，冇計。」他套用Rubberband一句歌詞：「回望那獅子山，還是會牽掛」，他說：「你問我有幾愛香港，我係好愛，但我係愛啲人，香港人係好拼搏，艱難時刻都好有骨氣，即使香港變到幾差，唔再係以前熟悉嘅香港，呢啲人就係令到我留低，繼續出力嘅原因。」
父母曾擔心兒子太高調會惹麻煩，但近年已決定放棄勸告這個硬頸的兒子
談家人 父令我留意政治
黃任匡自言性格硬頸，看不過眼的事定必出聲，他中六時做學生會會長，適逢六四事件十周年，他堅持要在學校搞悼念活動，因而多次被召入校長房，「校長好保守，不停叫我唔好搞咁多嘢，話好麻煩。」周旋一輪，活動最後還是搞得成，他慶幸自己活在那個年代，「我諗如果呢個年代嘅學生想搞呢類活動，可能會被趕出校。」
他留意政治，或受爸爸影響，黃爸爸會將社會大事剪報留起，當年六四的片段，更錄影下來保留至今，留給下一代看，「而家呢盤棋，呢一代好大機會捉唔完，所以點樣灌輸下一代正確價值觀係好重要，我喺爸爸身上睇到呢樣嘢。」這個年代還敢生仔嗎？他思考了一會，「的確現時氛圍係令人卻步……我未諗呀，我係好鍾意小朋友，如果我將來有緣有小朋友，我會畀佢覺得自己係香港人，而呢個身份係值得驕傲嘅。」
雖然父母支持他的理念，但黃媽媽還是擔心兒子會惹來麻煩，對他有微言，「佢哋知我硬頸，呢個仔話唔聽，近幾年冇再講喇。」另一半呢？他不希望太高調，「我同前妻分開咗，而家又拍緊拖，唔好講喇。只可以話佢哋理念同我相近，有驚有擔心嘅，會諗醫管局會唔會突然有一日話永不錄用我㗎。」
黃任匡工作極忙，一星期只得一日假，又要搞政治，社運，始終都要些興趣去調劑。睇書，種嘢、養魚、畫畫、行山、跑步，黃任匡統統都啱，「我鍾意一樣嘢，就會花好多時間鑽研，玩到好精，然後唔玩，之前我有玩水草造景，種蘭花杜鵑，喺丹麥就學沖咖啡。」睇書，以為他一定是看政治書或醫學書，詎料他向記者推介一本《The Tattooist of Auschwitz》，是二戰時期發生在猶太集中營的愛情故事，原來鍾意睇愛情小說，認真估你唔到。
