■佔中發起人戴耀廷（左）和佔中金融組成員陳漢輝（右）
做了一年半「佔中推銷員」的戴耀廷形容，要說服中產參與，「就好似要佢哋買1萬蚊個電飯煲咁」。認購了「萬元電飯煲」的佔中金融組成員陳漢輝說，眼見金融界嚴重赤化，不想下一代要靠黨員裙帶關係才可生存，令他決定豁出去。「推銷員」當務之急，是如何挽回泛民溫和派參與6.22投票。陳漢輝會這樣向中產朋友解釋：「你唔投呢，就等於啞。啞咗呢，北京就會話：香港人（對普選）都冇興趣」。戴耀廷也有同感，「唔做任何嘢，其實你已經投咗票，你係噤咗聲」。
記：《蘋果》記者
戴：和平佔中發起人戴耀廷
陳：佔中金融組成員陳漢輝（Edward）
去年1月，戴耀廷提出以佔領中環爭取普選。一年半後，他的主張，在中產圈子內，究竟有多少迴響？
陳：戴教授那篇文章，我當時沒看（戴：我也猜大部份人也沒看）。約在去年3月，留意到新聞說公民抗命，當時只覺他只是寫寫吧，香港人怎會肯做？
六四、7.1、反高鐵、反國教我都有參與，但那只是當日行兩三小時就散。這次（佔中）行動，每個人要有自發性，最基本要去商討日。做義工、文宣，公民參與性多了，對香港中產是有幫助的。「你要明白，香港中產，有錢搵、有學返、有工做就算啦，突然間叫佢坐喺條街度搞啲咁嘅嘢，喺佢哋腦度得兩個字咋，就係『搞事』」。
但所謂的「搞事」，只是大家認真認識一下甚麼是公民抗命，其實是很平和、很斯文的事。「其實中產都係由後生仔出嚟做嘢，慢慢搵錢上去變中產，佢哋都激情過，只不過覺得，你衝上街，點樣去跪、點樣去嘈，嗰啲係大學生、後生仔嘅事，你做咗30、40年人呢，唔做呢啲嘢啦，但有得坐低咁去discuss，係好囉」。
戴：佔中若只靠社運人是不夠的，要開拓市場，一定要慢慢做。要求他們（中產）參與的門檻很高、代價很大，「就好似要佢哋買1萬蚊個電飯煲咁」，要他們明白到，這對香港長遠發展、對下一代有何好處。過去一年來，一直有25%市民支持公民抗命，能否突破到三成或五成？6.22投票是最重要，是真正向外推廣的過程。若6.22投票率好，會是一個轉勢。
佔中重點是，爭取民主要付出代價，即是說，你不可以做free rider，這可能跟中產思維有些矛盾。曾有一次金融界聚會，有一個人說，「佔中我一定會出嚟，如果有好多人嘅話」，即是西瓜靠大邊，比較識計數，這思維，或影響一些中產的參與。
陳：其實中產很多顧慮，「冇咗份工點？有啲仲成日返大陸」。我已告訴了公司的partners。我是持牌人，SFC（證監會），有fit and proper criteria。「你問我驚唔驚，驚㗎。我良好市民，從來未俾人拉過（戴：me too）。我更加驚係，如果未來個個都唔出聲，到咗2017由北京主動揀三個人出嚟，跟住話由你哋市民揀啦，咁個個又以為真係有得揀，揀完之後，仲衰過梁振英嘅，大陸化越來越強，咁到時我點呢？」
我呢一代，講真，冇乜所謂，如果我做多十年嘢，搵得到多啲錢，可以唔做，咁但我啲小朋友點呢？我諗好多係小朋友，如果香港再咁搞落去，佢哋係冇可能喺香港生活喎，一定要同佢哋過外國。
記：為何你會覺下一代在香港生存不到？
陳：我的一代相對幸運，七十年代出生，有很多機會，肯努力，就可做到專業人士，能改變命運。現在這年代，也可做到，但已格外辛苦，「你唔可以揼架木頭車，賣魚蛋，賣賣吓，入咗間舖，做老闆，𠵱家冇呢樣嘢，食環署都趕走咗你啦」。
我的孩子那一代會怎樣？就看看金融業，大陸有許多財經界人士已進駐，香港是國際城市，很歡迎大陸資金。但你看看他們的資金來源在哪裏？江澤民的孫，20多歲已籌到幾億美金，開展 asset
management fund，「作為一個20幾歲嘅人，正常嚟講，除非你係李嘉誠個仔，否則嘅話，你點解會有呢？你見到好多都係咁，全部都係因為黨員裙帶關係落到嚟！」
「嗱，呢個情況，係衰過富二代好多。本土嘅富二代，係因為佢爹哋媽咪努力，搵到錢，佢識投胎啦，做有錢仔，但你見到李澤鉅、李澤楷佢都要做，但係你見到呢啲官三、四代呢，佢哋理論上真係唔使做㗎，佢哋嗰嚿錢，真係唔使籌㗎。一坐落去，喺中環開個office，就已經有2億美金畀佢哋玩，咁呢2億美金點嚟，全部都係國家嘅錢！」
這情況越來越嚴重，我下一代，如果做金融，他的上一層，全部都會是這些官四代、五代，「咁衰啲講，我哋呢啲港燦嘅仔女，就只能夠喺佢哋下面打工」。
「當我哋香港父母咁辛苦，用咁多資源、時間去搞教育，到頭來，佢哋留喺香港嘅機會受限制咗，限制唔係因為佢哋能力，而係因為我唔係一個黨員，令到佢冇呢個裙帶關係入到去。香港家長要問一問，你想未來香港社會係點先？」
記：有普選就能抗赤化？
陳：直接沒甚麼大影響，但文化上會有改變。有普選，政府制訂政策，如金融政策，要業界支持才可。如政府是民選，財政司司長、財經局局長等問責官員，間接地對所有民眾要負責，不是只報告給特首，不用理其他人。「呢種風氣蔓延，你有普選，啲人先會學識乜嘢叫民主。慢慢學，啲人會更加着重乜叫公平競爭，唔係靠你身份、血緣就可控制一切」。
5月6日商討日三，佔中參與者選出的三個方案，都只得公提成份，一度令不少溫和派泛民支持者打算杯葛6.22投票。
記：金融組對商討日三投票 結果也曾想翻案？
陳：我有法律界、工程師、醫生朋友，約70、80位中產，不約而同說，溫和方案「冇晒」，已沒意義，不會去投票。
但今天的情況已較四周前好，很多朋友回心轉意。「投票發聲，你一定要投，你唔投呢，就等於啞。啞咗呢，北京就會話：香港人都冇興趣，佔中呢班人，唔該你收聲啦，係咪諗住俾人咁樣去騎劫法呢？」
戴：5月6日的投票，有兩樣東西：我最喜歡甚麼，這不是最高層次。如會再想，在一個全民投票時，香港人要有甚麼去選擇，這是對民主有更深度認識，投票的結果就會不同。要經歷這過程，才會明白民主的真義。
此外，包括溫和民主派的朋友，也要想想，「唔係坐喺度等運到㗎。你唔好諗住人哋一定支持你，你要做嘢嘅，要人接受你意見就要做嘢，唔可以諗住我係邊個，講出嚟人哋一定聽」。
其實要到第二次全民投票，才是一個真正公投，現在（6.22）的投票，是累積力量，令你將來有一個更好的選擇。「唔做任何嘢，其實你已經投咗票，你係噤咗聲，你唔投票，就代表沉默」。
記：溫和派如何能透過6.22投票而翻盤？
戴：6.22投票，不是沒意義，溫和派，無論投一二三哪個方案，只要能令總投票人數夠高，到下一輪全民投票，就有機會選自己要的東西。若成功逼到政府交出一個符合國際標準的，就當這是溫和方案，到那次全民投票，6.22方案及政府方案，就是一次真正給香港市民表達立場的機會。
記：若普選方案不合乎國際標準，中產認為應「原地踏步」還是將一人一票「袋咗先」？
陳：中產未必恨一人一票。有兩類中產，一種是「一人冇票」也沒所謂，因他們從不投票。會出來投票的一群，他們會了解你給我那一票，是真的一票還是假的一票。「中產唔會只因一人一票就好滿足。一係就唔理，一理呢，就要有實質一票」。
如你是溫和派，支持2020或湯家驊方案，當6.22投票率出了，政府才會再聽。「北京會睇到，香港人你唔好恰佢喎，咁啲溫和派可以做嘢，可以約見北京，講民建聯嗰兩個唔掂㗎，不如喺嗰15個（方案）度執2個啦，就算係何濼生嗰個（戴：唔係呀，何濼生嗰個好過陳太嗰個㗎，提名嗰度，直選部份高過陳太嗰個㗎）。
戴：希望可令投票人數達到30萬以上，30萬人投票，約3%就有萬人佔中。若50萬人投票，2%就「搞掂」。「投票某程度係玩緊槓桿，你嗰票，未必會佔中，但可扮佔中，放大你一票嘅影響力，產生一種槓桿效果，等北京驚。」
記：（訪問當日）今天是6月4日，六四的鎮壓，對佔中運動有何啟示？
戴：我不認為北京會在佔中採取六四的策略，這一代的領導人跟上一代思維很不同。香港人有六四教訓，不會賴死不走，「即使佢出軍隊，咪走囉。你由邊界、軍營出架坦克車，早就落晒港鐵站，雞飛狗走啦，點會有機會鎮壓到」進退要有依據，你走了，我們再佔過。
陳：香港是國際級大城市，跟當時的北京不同。若你摧毀香港，金融領域完全「玩完」，「你試吓搵架坦克開幾炮，跟住搵機關槍射啲人呀，恒指跟住會停牌」。現時中國的領導人都是向錢看。對香港佔中，如用坦克車去鏟，等同將自己荷包啲錢掟落海，現時領導人，不會做這種事情。
後記
斯文中產今次不單純上街，還要捲起衫袖投入抗爭。除了有被捕的心理準備，Edward和一批佔中金融組成員更曾認真商討如何「裝備」自己。他們估計，警察會用胡椒噴霧「兜口兜臉」狂噴和平示威者，可能要帶備防毒面具、要有一副醫生用的大goggle（眼罩）、「需唔需要戴埋頭盔呢？因住警棍打爆你個頭。咁射水炮時，記住後面要孭住個背囊，因為驚住會（射到）斷骨……」
