■李卓人本月初參加國際職工會聯盟搞嘅非洲考察團
早排好多外媒報道，國家主席習近平提倡嘅「一帶一路」，不但對合作嘅國家冇幫助，更令佢哋負上沉重債務，原來受害嘅仲有呢啲國家嘅人民。
一向關注香港打工仔權益嘅工黨前立法會議員李卓人，本月初以職工盟秘書長身份參加國際職工會聯盟搞嘅非洲考察團。阿人此行去咗尼日利亞、贊比亞同埃塞俄比亞，前後接近兩星期，印象係中國嘅「一帶一路」好無透明度，令當地好多打工仔覺得「被賣豬仔」。
工會領䄂被炒魷
點解？阿人話，因為中國政府同非洲當地政府簽署協議時，對當地勞工權益、工人就業優先權等嘅問題都隻字不提，其間輸入大量中國技術外勞，但無將技術轉移畀當地嘅工人。阿人又話，以前世界銀行參與嘅項目，都以保障勞工權益作為貸款條件，但「一帶一路」就破壞晒呢個規矩，令當地公司唔使承諾保障勞工權益，都可獲中資銀行貸款，有中資公司更將搞工會嘅工人炒魷，完全唔尊重當地勞工權益。
總結此行，阿人話雖然試過喺埃塞俄比亞肚屙，同對當地嘅嘢食唔係好習慣，但總算成功推動咗國際職工會聯盟關注「一帶一路」喺非洲引發嘅勞工權益問題，同埋可以喺無時差下睇世界盃，所以都算係一次開心難忘經驗喎。
