與劉曉波算得上有交情的香港人不多，與他相識逾廿載的《開放雜誌》主編蔡詠梅是其中之一。她見證着這位和平獎得主在飽經憂患後，由驕傲張狂到謙厚忍耐的性格轉變。她透露，劉曉波在內地被全面消音封殺下，有知名作家邀請他以對談方式匿名共著新書，冒險雪中送炭，見證人間溫暖。
丟去教職，出入監牢，只能以寫文章維持生活，卻又因政治犯敏感身份，國內再無出版社敢為劉曉波出書，蔡詠梅說，自90年代劉已長期為雜誌供稿，是重要收入來源。「出獄後不久，佢喺國內被徹底消音封殺，生活好困難。除咗稿費，因再冇內地出版社敢幫佢出書，我記得有個知名作家好仗義，邀請佢以對談但匿名方式合著新書，個作家仲畀埋自己份稿費佢，等佢渡過難關」。
既是《零八憲章》港區聯絡人，又是劉曉波推薦加入獨立中文筆會的作家，蔡詠梅與劉曉波是工作夥伴也是好友，「佢以前自視好高，有啲目中無人，後來變得好客氣謙虛，朋友都講笑問佢係咪喺監入面信咗教？」
身為編輯，閱稿無數，她見慣大牌作家連標點都不能改，但文章寫得極好的劉曉波，總說尊重編輯自主，不介意文章被改；且又體恤別人處境，非常體諒。「試過獨立中文筆會喺北京搞活動，我本來想搵一個從商共同朋友贊助地方，佢聽到立即阻止，話會敏感，呢個朋友國內好多生意，怕咁樣會連累人」。
「佢相信留喺國內先做到嘢」
在內地，政治高壓之下，很多人頂住壓力，抱「我好勇敢，所以要求別人要與我一樣勇敢」的觀念，蔡詠梅謂這樣不是錯，但劉曉波卻從不這樣要求。「我記得簽署《零八憲章》，有個有名氣的學者同曉波講，話做緊一個project，對推動新聞自由有好處，怕簽名有影響，佢即時就話好理解」。蔡直言，年輕時的劉曉波，其實並不是這樣。「佢係一個悟性好高好聰明的人，書讀得越多，越知道年輕時的狂妄，其實並無基礎」。
「佢後期對自己有深刻鞭撻，常常自我懺悔，為六四後被迫簽下悔過書，甚至上中央電視台接受訪問，為曾說過在廣場上冇見過死人，而向天安門母親下跪道歉，要求原諒」。不斷自我反省的劉曉波，猶如變了另一個人。唯一不變的，是對信念的堅持。
「王丹、王軍濤都係由監獄直接送到機場，因為咁，佢一早同朋友講，指自己一定不會出國，任何呢類嘅安排，都肯定違反佢本人意願，以致今次爭取到海外治病，美國同德國方面，要求親身確認」。蔡指出，早於1993年，在國際有影響力的劉曉波，便曾獲邀出國受訪。
「嗰時好多人勸佢唔好返，佢被封殺，國內生活困難，海外又自由自在，但佢一直相信，只有留喺國內，先可以真係做到嘢」。曾出版《零八憲章》等書籍的《開放雜誌》，當年率先報道有關運動，蔡詠梅記得，劉曉波當年向她解釋憲章內容及源起，又要求她擔任港區聯絡人，透過她轉寄信件給仍在生的司徒華，尋求支持。那想到憲章計劃12月10日人權日公佈，兩日前劉已被捕，一意希望國家走上民主自由大道的理想，卻令自己陷入萬劫不復。
「我羨慕港人能夠用和平有序的街頭政治來表達民主訴求，並為港人捍衞自由和爭取民主的精神所感染。」
