藍絲家人憤慨：𠵱家信有警暴
https://hk.appledaily.com/local/20210124/LYR2ZBI3PRCMBIWV2R2FELEIHM/
「今次咁樣做嘢法，（警察）同暴徒冇乜分別囉，（警暴）家陣唔到我唔相信囉！」涉事孕婦一家人過去一直支持警隊，但經歷今次事件後，不禁直斥警方向一個手無寸鐵的孕婦上手銬兼粗聲粗氣，行為猶如黑社會，「啲差人𠵱家越做越衰，簡直唔係人」，其胞姊直言，如今在其眼中，警方所謂「正義」形象已經徹底破產。
「十足黑社會咁對市民」
「一隻狗都可能會知道有人性，呢啲（警員）直情冇人性」，昔日的撐警家庭，因家人遭遇看清警方真面目。孕婦劉女士的胞姊憶述，當日獲悉事件後，立即由石硤尾家趕到現場，赫見妹妹坐在地上，雙手被手銬箍至又紅又瘀，極為心痛，「辦入院手續時，我見佢（妹妹）簽字手都震埋」。
劉婦胞姊承認，一家人過去支持警方執法，惟經今次目睹懷有八個月身孕的胞妹遭警員粗暴對待，警隊在她們一家心目中所謂「正義」形象已徹底破產，更忍不住怒斥警方行為。劉弟表示，事發時他在永耀街一間店舖內，獲街坊告知其姊被捕，即上前了解，赫然看見懷孕胞姊坐在地上，雙手被反鎖，警員阻止他靠近，「叫我哋唔好阻住差人做嘢，話佢（胞姊）有攻擊性喎！大佬，六、七個差佬喺度，一個大肚婆有咩攻擊性？」
劉弟指，近日警方在區內不停截查市民，懷孕胞姊多次被警方截查，每次皆十分合作，豈料今次被粗暴對待，「家姐唔舒服，就挨住車胎要求叫白車，差人就話佢玩嘢」。劉弟批評警員態度惡劣猶如「爛仔」，「十足黑社會，一面兩人，估唔到香港差人可以咁樣，呼呼喝喝咁對市民」。
他指，8月底旺角有孕婦遭警員推跌，由於有記者在場，處理手法大相逕庭，「當時扶住大肚婆安慰，今（當）日喺度查身份證，可以咁嘅語氣咁嘅態度，香港警察係世界一流」，隨即豎起尾指示意。
事發後他們為免年近七旬母親擔憂，一直隱瞞事件，惟事件經街坊廣泛討論，終紙包不住火，劉母指「個心好痛，成晚瞓唔着，驚我暈低」。對於警察無理執法，劉母怒火中燒，直斥「佢已經坐喺地下，你仲用手銬鎖佢，話佢阻差辦公，你話佢阻你咩呀？啲差人𠵱家越做越衰，簡直唔係人」。一家人指劉女士遭警員粗暴對待送院後一直留醫，昨提早逾兩個月誕下男嬰，認為早產與事件有直接關係。
