■懷孕六個月的準媽媽楊瑾，與IT人丈夫梁弘熙自發組織流動電子票站助市民投票
全民投票踏入最後一天，75萬人「票已投」。不少有心人有感光是投票仍不夠，自發到票站做義工，助更多人投下良心一票。準媽媽楊瑾懷孕六個月，與IT人老公梁弘熙自發組織流動電子票站，以行動對抗沉默與犬儒。投一票後，再多行一步，感覺是：「本來只係想幫吓人，但原來令自己更有力量。」
楊瑾笑言，當天在街站沒被指罵，反應是意料之外的好，慶幸許多上年紀的人都走出來投票，「感到好empowered，本來只係想幫吓人，但原來令自己更有力量」。她感嘆，自己連家人也說服不了，「好多人話唔想個社會亂，所以唔同意佔中，我就會話，惟有一個可靠嘅制度做出口，大家有得揀，個社會先唔會亂」。弘熙也苦笑道，有時自覺是外星人，「同老朋友敍舊，簡單問句『大家投咗票未？』，有人即刻答『我哋食飯唔講政治』，順便轉話題講世界盃」。
朋友與家人對政治的冷漠一度令二人灰心，加上由國教到白皮書，港府及北京的強勢，也令他們既憤怒又不安，「好擔心啲嘢講講吓就變成真」。楊瑾認為，有人批評佔中只講不做，但其實由公投引發的討論多到「嘭嘭聲」，「今次係發生前講明我唔要啲乜，唔係有事發生、覺得唔對路至拒絕」。他們更留意到，越來越多自發性的小組織冒起推動社會改革，感到港人漸漸學會由紙上談兵是不夠的，「今次唔只係公民覺醒，更加係真正嘅遍地開花」。
積極爭取真普選，但他們也坦言普選並非萬靈丹，有票可投只是很基本的參與，更理想的香港是更多人挺身而出，孩子即將出世，準媽媽寄望道：「唔係只講無力感或想移民，而係有心有力嘅人有正常渠道去參與公民社會。」
弘熙說看過不少外國紀錄片，人們不只投入有關政制的大論述，也樂於花時間商議社區設施等小議題，「唔會話要湊仔好忙、返工好忙、有捐錢就得，而係切切實實去體現公民精神」。弘熙形容自己的心態如信仰，「好多人會話你做幾多嘢都冇用㗎啦，但我選擇相信係有用㗎，政府爛成咁，惟有由下而上嘅公民抗命先可能改變」。
